Publications

Жените се наоѓаат во значително понеповолна политичка положба од мажите во однос на нивното политичко ангажирање и влијание, како во богатите земји така и во регионите во развој. Жените од немнозинските заедници често се соочуваат со двојна дискриминација врз основа на нивниот род и етничка припадност. Ваквата неповолна положба слично се забележува и кај жените од немнозинските заедници во Северна Македонија. Поради тоа, оваа студија има за цел да направи сеопфатно испитување на степенот и околностите на политичкото учество на жените од немнозинските заедници во Северна Македонија, нагласувајќи ги повеќеслојните нееднаквости со кои се соочуваат жените од заедниците во нивните обиди да се приклучат кон политичкиот и јавниот живот. Студијата користи мешавина од квантитативни и квалитативни методи на истражување, што подразбира примарно собирање податоци преку теренско истражување во кое беа вклучени 1002 испитанички и шест интервјуа, како и секундарна анализа на податоците.

Истражувањето за млади и безбедност дава преглед на перцепциите, погледите и ставовите на младите за безбедноста и сигурноста во Северна Македонија, нивното учество во формални и неформални мировни процеси, мировната и безбедносната агенда и прашања поврзани со борба против и спречување насилен екстремизам во Северна Македонија. Истражувањето опфати младинско насилство, сајбер-малтретирање, исклучување и маргинализација на сите нивоа, недостаток на доверба во властите и односите меѓу заедниците во изминатата деценија.  Истражувањето има за цел:  1. Процена на перцепциите, ставовите и предизвиците на младите во однос на безбедноста и сигурноста во Република Северна Македонија;  2. Истражување на безбедносните прашања и предизвици со кои се соочуваат младите луѓе во тековниот општествено-политички контекст;  3. Да се испитаат начините на кои младите се погодени од безбедносните политики и како може да се зголеми практиката на значајно младинско учество во безбедносните политики и програми;  4. Истражување на изворите на насилство меѓу младите, потенцијалниот придонес на младите во безбедноста, сигурноста и градењето отпорност во нивните заедници;  5. Истражување на факторите што влијаат на меѓуетничките односи и кохезијата меѓу младите во земјата;  6. Собирање информации што го поддржуваат стратегиското планирање на Мисијата. Целна група на ова истражување беа млади од 15 до 29 години од Република Северна Македонија.  Во примерокот беа вклучени вкупно 1 235 испитаници преку телефонската анкета. Дополнително, истражувачкиот тим спроведе пет (5) полуструктурирани интервјуа со засегнатите страни и осум (8) дискусии во фокус-групи во осумте плански региони во градовите Скопје, Битола, Тетово, Свети Николе, Штип, Струмица и Струга со вкупно 63 учесници. Истражувањето беше спроведено во периодот од 27 септември до 10 октомври 2023 година, додека дискусиите во фокус-групите се одржаа од 4 до 26 октомври 2023 година.  Истражувањето е достапно на англиски, македонски и албански јазик.

Овој прирачник е практична алатка за процена на влијанието на регулативата и политиките во централната и локалната владеење и има за цел да го олесни процесот на инкорпорирање на родовата перспектива во одлучувањето. Прирачникот дава основни информации и практични упатства за тоа како да се оцени влијанието на родовата еднаквост врз политиките и донесените одлуки и регулативи. Методологијата и практичните алатки презентирани во овој прирачник може да се применат и на други ранливи групи во општеството, како што се: лицата со попреченост, малцинските групи итн.

„Барометар за еднакви можности“ е истражување спонзорирано од ОБСЕ и ЕУ, кое беше спроведено во соработка со Комисијата за спречување и заштита од дискриминација и Македонскиот центар за меѓународна соработка. Ова сеопфатно истражување ги открива клучните наоди кои ги рефлектираат перцепциите и искуствата со дискриминацијата и нееднаквоста во Република Северна Македонија. Спроведено со различна демографија, и споредено со минатите истражувања од 2009, 2013 и 2018 година, тоа ни дава значителен преглед на развојните трендови во оваа област.

Овој Извештај содржи оценка на тековниот правен статус, начините на управување и финансирање на Медиумската информативна агенција (МИА), компаративна анализа на регулативата за правниот статус на новинските агенции и препораки за ажурирање на правниот статус на МИА.

Извршувањето на санкциите е последното парче што го затвора целиот процес на пресудување во кривичната постапка. Недостигот на соодветно спроведување на санкциите преку јасна, разбирлива и правична постапка, нецелосната законска рамка, како и неконзистентната практика на судовите во четирите апелациони подрачја во Северна Македонија, придонесува за негативната перцепција на јавноста, особено во случаите од „висок профил“. Мисијата, во соработка со Здружението на судии и Основниот кривичен суд Скопје, изработи Анализа на практичните проблеми на постапката за извршување на санкциите, адресирање на законодавните празнини и обезбедување конкретни законски решенија. Анализата вклучува различни судски практики од апелационите подрачја и препорачува практични пристапи за надминување на одредени предизвици.

Во текот на имплементацијата на актуелниот ЗКП, преку активностите поврзани со набљудувањето на судења и преку разговор со националните практичари, стана очигледно дека една од слабостите кај правните практичари е адекватното користење на вештачењата, вештаците и техничките советници како алатка за претставување на фактите како доказ пред судот и нивното ефективно, ефикасно и финансиски оправдано однесување во согласност со правилата и принципите на националната кривична постапка. Законот за вештачење, како lex specialis, треба да се сфати во контекст на ЗКП и целта на вештаците при судењата од кривичната област. Поради тоа, Мисијата на ОБСЕ во Скопје го поддржа изготвувањето на овој Прирачник за правните практичари, вклучувајќи позитивни и негативни примери од националната судска практика, судската практика на ЕСЧП и дополнителни елаборации на новините во Законот за вештачење.

Публикацијата има за цел да го разјасни процесно-правниот концепт на префрлање на товарот на докажување, неговото значење и опсег, како и сите отворени прашања поврзани со практичната имплементација на постапките пред Комисијата за спречување и заштита од дискриминација и националниот суд, за да се обезбеди ефективна примена на Законот за спречување и заштита од дискриминација. Исто така, се фокусира на помагање на правните практичари во стекнување знаења и вештини во областа на правото за еднаквост и принципот за недискриминација, оттука пошироко се користени примери од Судот на правдата на Европската унија и Европскиот суд за човекови права, како и споредбените практики од европските земји.

Публикацијата се состои од внатрешни и надворешни проценки на активностите и структурата на Академијата за судии и јавни обвинители (АСЈО). Внатрешната проценка е насочена кон оценување на процесите на донесување одлуки, органите на управување и структурата на вработените. Воедно, вклучена е и проценка на потребите за обука на органите на управување и на вработените во АСЈО, за подигање на нивните знаења за различностите и родовата еднаквост. Анализата на надворешните активности проценува дали различностите и родовата еднаквост се вклучени во целокупната обука што се спроведува во АСЈП, вклучително и во подзаконските акти за почетно и континуирано образование и обука, како и во годишните наставни програми.

Извршувањето на пресудите на Европскиот суд за човекови права претставува значаен и сложен процес кој вклучува голем број на чинители инволвирани во самото извршување или во надзорот над извршувањето, што може да го отежне или забави спроведувањето на мерките или активностите што треба да доведат до ефективно извршување на пресудите. Наставните програми за обука беа развиени во соработка со националната Академија за судии и јавни обвинители (АСЈО). Таа беше специјално подготвена за сегашните и идните судии и јавни обвинители кои посетуваат обука во АСЈО.