OSBE-ja trajnon zyrtarët e administrimit të zgjedhjeve në Shqipëri

Të shtatë anëtarët e Komisionit Qendror të Zgjedhjeve morën pjesë në një kurs për menaxhimin zgjedhor, të organizuar nga Prezenca e OSBE-së në Shqipëri, në bashkëpunim me organizata të tjera ndërkombëtare. Trajnimi, në të cilin morën pjesë edhe anëtarë të rëndësishëm të administratës së KQZ-së, u zhvillua në Budva të Malit të Zi, nga data 17 deri më 22 janar 2013.

Ky projekt është pjesë e punës së vijueshme të Prezencës për të rritur kapacitetet e autoriteteve kombëtare në përmirësimin e përgatitjeve dhe administrimit të proceseve zgjedhore, duke pasur parasysh edhe zgjedhjet e përgjithshme të planifikuara për më 23 qershor 2013.

Kursi u përqendrua në rolin e institucioneve të administrimit zgjedhor në menaxhimin e të gjitha fazave të ciklit zgjedhor, me vëmendje të veçantë te zbatimi i teknologjive të informacionit në zgjedhje. Tema të tjera përfshinë perspektivën gjinore në zgjedhje, punën me aktorët kyç, trajtimin e ankesave, misionet e vëzhgimit të zgjedhjeve, si dhe çështje të prokurimit dhe logjistikës në zgjedhje. Trajnimi u zhvillua nga ekspertë të Qendrës Ndërkombëtare për Studimet Parlamentare. Pas përfundimit të kursit, pjesëmarrësve iu dha një certifikatë në menaxhimin e zgjedhjeve, e njohur ndërkombëtarisht.

Kursi u mbështet nga qeveria britanike, Këshilli i Evropës, USAID-i dhe UN Women.