Prezenca e OSBE-së jep kontribut e saj për një mbrojtje më të mirë të të drejtave të fëmijëve

Prezenca e OSBE-së në Shqipëri organizoi më 11 tetor 2011, në bashkëpunim me Bashkinë e Elbasanit, të parin nga një varg prej dhjetë seminaresh trajnuese për mbrojtjen e të drejtave të fëmijëve.

Objektivi i seminareve është që të promovojnë të drejtat e fëmijëve si dhe të sigurojnë një mbrojtje më efikase të tyre në nivel vendor. Mësues, psikologë, mjekë familjeje dhe punonjës policie po marrin pjesë në këto trajnime ndërdisiplinore duke u njohur më gjerë me dispozitat e Ligjit Mbi Mbrojtjen e të Drejtave të Fëmijës, si dhe duke mësuar më tepër rreth Njësive për Mbrojtjen e Fëmijëve të themeluara në nivel vendor.

“Njësitë për Mbrojtjen e Fëmijëve që po themelohen anembanë vendit përbëjnë një gur themeli në fushën e mbrojtjes së të drejtave të fëmijëve. Shpresojnë se ato do të kthehen në një simbol bashkëpunimi dhe koordinimi të efektshëm mes të gjitha grupeve të angazhuara në mbështetjen, mbrojtjen dhe udhëheqjen e fëmijëve,” tha Ambasadori Eugen Wollfarth, Kryetari i Prezencës së OSBE-së. “Këto Njësi duhet të bëhen gjithnjë e më të dukshme si dhe të fuqizohen për të shërbyer si një fanar ndriçues për të gjithë fëmijët që kanë nevojë për këshilla, për të gjitha familjet të cilave u nevojitet mbështetje, si dhe për gjithë të tjerët që i bashkojnë forcat në mbrojtje të fëmijëve si një nga kategoritë më të pambrojtura dhe më të pafavorizuara të shoqërisë sonë”.

Seminaret trajnuese zhvillohen në kuadrin e veprimtarive më të gjera të Prezencës me synimin për fuqizimin e kapaciteteve të Njësive për Mbrojtjen e Fëmijëve. Ky projekt po vihet në zbatim falë mbështetjes së Qeverisë Franceze, e cila qysh prej shumë vjetësh ka asistuar në implementimin e projekteve në fushën e mbrojtjes së fëmijëve në vend.